Haba Jameun Peulandôk Peungeut Buy

Kheun Peulandôk : “Lam dônya nyoë, manôsya nyang paléng teuga, hana nyang leubèh nibak seula’én manôsya.”

Jaweuëb Buy : “Peuë kapeugah nyan, han kupatéh. Meunyö manôsya leubèh teuga nibak kèë, ci kapeuleumah, nyang töh manôsya nyan? Ngat kupeuhabéh cucoë-cucoëjih.”

Kheun Peulandôk lom : “Singöh beungöh kajak u rumoh kèë ngat kupeuleumah nyang töh manôsya nyan.”

Ban singöhjih, jan reuneum katrôk buy u rumoh peulandôk. Jih han ubah janji keuneuk kalön manôsya nyang jipeugah lé peulandôk. Watèë nyan laju jiba buy lé peulandôk lam uteuën bak binèh ra’uëh nyang kayém jilèwat lé manôsya. Na siat leumah sidroë anek miët, aneuk jak sikula.

Jitanyöng lé buy : “ Nyan nyang ka kheun manôsya? Meunyö nyan jih sigö kukông reubah teugageuëng.”

Jaweuëb Peulandôk : “Nyan gohlom manôsya, keumeuk jeuët keu manôsya.”

Na siat leumah ureuëng tuha bungkôk geujak ngön tungkat.

Jitanyông lom lé buy : “Peuë nyan nyang ka kheun manôsya? Bacut kucukèh meubalék lam luëng.”

Seu’ôt Peulandôk : “Nyan ka leubèh manôsya, bah tajak ho la’én mangat meurumpok ngön manôsya.”

Ban duwa meulatang nyan jitamöng lam uteuën. Deuh jikalön sidroë pawang rusa. Bak bahô meusalang budé bak keu’iëng peudeuëng.

Kheun Peulandôk : “Nyan keuh nyan manôsya, ci kalawan,!! Kèë han kuteujeuët, bah kumeusom sinoë.”

Jaweuëb Buy : “meunyö nyan manôsya kèë hana kutakôt, kakalön jinoë kuking reubah jih.”

Lheuëh jikheun meunan, laju jipluëng buy jilét pawang rusa. Golom trôh jireungkhom ka jitimbak lé pawang rusa, keunöng bak pruët di buy nyan. Jitajô sigö treuk, jihapit peudeuëng, putôh geulinyuëng buy siblah. Buy pih jipluëng meutaga bak peulandôk.

Jitanyöng lé peulandôk : “Cuba kapeugah, kiban kri ngön manôsya !”

Jaweuëb lé buy:  “Phôn-phôn kutajô jibeu’ôt jaroë jih, jitunyok uateuëh kèë, teubiët apuy keunöng pruët kèë. Sakét lagôyna.”

Tanyöng lom lé peulandôk : “Lheuëh nyan kiban lom?”

Jaweuëb buy : “Kutajô sigö teuk, jitarék tuleuëng rusôkjih sikrèk, jihapit putôh geulinyuëng kèë siblah, sakét that-that, kupluëng laju keunoë bak kah.”

Teuma kheun peulandôk : “Kön ka lheuëh kupeugah yôh bunoë kön, tan soë ék lawan manôsya. Kön meugeutanyoë pih, gajah ngön rimuëng pih ék jidrop lé manôsya. Peuë lom kah buy raya pruët.”

Seujak uroë nyan keuh buy jitakôt keu manôsya, han jiteujeuët ngiëng sagay uateuëh manôsya. Beurangkaho jijak buy sabé-sabé jikalön u miyub.[]