Profil Teuku Chik Muhammad Djohan Alamsjah Ampôn Chik Peusangan.

Lheuëh nyan, lheuëh geumat jabatan ulèëbalang dan geu’èk haji, cucô Teuku Chik Muhammad Hasan nyan geubôh nan, Teuku Haji Chik Muhammad Djohan Alamsjah Peukasa Alam.

Lam seujarah Acèh abad keu 20 masihi, Teuku Tjhik Muhammad Djohan Alamsjah leumah seubagoë ulèëbalang Acèh nyang jithèë.

Éseutana Nanggroë Peusangan

Pulo Ibôh, teumpat lahé dan bak teumpat Teuku Muhammad Djohan Alamsjah rayêk, bak teumpat nyan cit seubagoë teumpat raseumi geuduëk ulèëbalang Peusangan.

Pulo Ibôh geukheun cit seubagoë kuta ulèëbalang (meuligoë) nanggroë Peusangan.

Gampông Iboh seubagoë gunci peunténg lam seujarah rèvolusi sosyal Acèh bak thôn 1945 – 1946.

Meusangkôt-pawôt ngön gampông Ibôh na calitra laén. Nibak gampông nyan keuh ureuëng chik Teungku Amir Husin Al Mujahid asai gampônggeuh.

Bak watèë prang Acèh ngön Olanda nyang teungöh seu’uëm that blah röt barôh Acèh, keuluwarga ureuëng chik Husén al Mujahid meungôngsi u nanggroë Idi, nyang ka geumeurakan ngön keurajeuën Olanda ka trép seugohlom Prang Acèh–Olanda beureutôh.

Ureuëng Acèh geubri lakab nyang agông keu Amir Husén al Mujahid, Napoleon Bonaparte Acèh, sabab meuhasé geupeureuntôh dan geupoh mandum ulèëbalang Acèh cuma lam padup uroë sagai.

Gobnyan pih sanggôp geupeugabuëk Rèsidèn Acèh/ Jeuneural Mayo TKR/TNI Teuku Njak Arief dan geuba u kamp tahanan di Takéngon.

Napoleon Bonaparte Acèh ngön  laskargeuh TPR (Teuntra Peujuwangan Rakyat) deungön beuhê that geupoh ban mandum ulèëbalang Acèh meusigö ngön ureuëng ikôt ulèëbalang.

Peundidékan

Seulama 3 thôn Teuku Muhammad Djohan Alamsjah ngön Abdul Karim geumeureunoe bak Sikula Rakyat Guru Djam di Kutaradja.

Gurèë Muhammad Djam, ureuëng Minangkabau nyan that bako lam bideuënggeuh. Seucara pribadi ban duwa aneuk muda Acèh nyan geudidék dan geupeureunoë deungön saba.

Peulajaran nyang phôn that geupeureunoë nakeuh matematik, cara baca ngön tuléh haraih latèn, bahsa Meulayu, cara meungön macarakat Olanda, éleumèë seujarah ngön politék Hindia Olanda.

Ban duwa aneuk muda nyan geumeununtut éleumèë ngön jeumöt that.

Gubernur Olanda di Acèh, Jeuneural van Heutz that puwah ngön kineureuja Gurèë Djam.

Untôk geukeunöng guna-jasa Gurèë Muhammad Djam lam bideuëng peundidékan, pomeuréntahan Hindia Olanda di Acèh lheuëh nyan bak saboh uroëk geubôh nan jalan di keuë rumoh sikula nyan, jalan Guru Muhammad Djam.

'Oh lheuëh abéh masa peindidékan nyang jimeuheut lé Olanda, Teuku Muhammad Djohan Alamsjah deungön rakangeuh dan ureuëng kawaygeuh nyang seutiya jipeuwoë lom u nanggroe Peusangan.

 Jeuneural van Heutz jianggap ulèëbalang muda Acèh nyan ka meuhasé jipeuseu’iët.

Keu Teuku Muhammad Djohan Alamsjah jipeucaya lom jabatan ulèëbalang Peusangan nyang nyang ka geuangkèë lagèë sarakata Seulôtan Acèh.

Lam geulaksana tugaihgeuh lé ulèëbalang muda nyan geubimbing lé Abucékgeuh, Teuku Djeumpa.

Bak hakékat abucékgeuh sang nyang peujak tampôk kuwasa keu ulèëbalang nanggroë Peusangan.

Jeuët Keu Ulèëbalang

'Oh lheuëh hana lé Teuku Chik Syama'un, Nanggroë Peusangan ka mulai jitamöng masa barô nibak tampôk kuwasa Teuku Chik Muhammad Johan Alamsyah (Ampôn Chik Peusangan).

Ékonomi nanggroë Peusangan nyang teungöh krisih meusabab peungarôh prang ngön Olanda bak masa Teuku Chik Syama'un, nyang jeuët keu tantangan beugi Ampôn Chik Peusangan untôk geutata keulayi ékonomi nanggroëgeuh.

Ampôn Chik Peusangan geupeuangkèë seubagoë Ulèëbalang Peusangan lé Seulôtan Acèh, Tuanku Muhammad Daud Syah bak umu 10 thôn.

Watèë geupeuangkèë nyan geupeugöt seucara meusom-meusom bak watèë Seulôtan Acèh geujak saweuë u Matanggeulumpang Duwa, nang Nanggroë Peusangan.

Lheuëh trôh haba nibak utôsan Teuku Chik Syama'un bahawa ulèëbalang (Teuku Chik Syama'un) nyang teungöh mantöng lam uteuën teungöh brat that sakét, maka meusabab nyan keuh Ampôn Chik ( Teuku Muhammad Johan Alamsyah) langsông geulantik lé Seulôtan hana jitupuë lé Olanda.

Jiwa keupeumimpénan dan diplomasi na nibak Ampôn Chik Peusangan. Cara geupeubuët bida deungön pue nyang ka geupubuët lé ureuëng chikgeuh.

Gobnyan leubèh geupeuutama èkonomi nanggroëgeuh dan geupeumaju peundidékan.

Lam teungöh suwasana teunang, gobnyan geupinah jrat ureuëng chikgeuh,Teuku Chik Syama'un, nibak lam uteuën u Gle Sabe di Matangglumpang Duwa. Röt geuniréng bukét nyan na pasai gampông Matang.[]