24 C
id

Tuwanku Hasyim Banta Muda, Wali Neugara Keusôltanan Acèh Nyang Keuseuneulheuëh

Tuwanku Hasyim Banta Muda
Tuwanku Hasyém Banta Muda, Wali Neugara Keusôltanan Acèh Nyang Keuseuneulheuëh


ACHEHNETWORK.COM – Jeurat gobnyan na lam seulingka pageuë seumeujid tuha Padang Tiji Kabupatèn Pidië.

Hána soë sangka jeurat nyan nakeuh jeurat sidroë Panglima rayek lom sidroë Wali Nanggroë keuseuneulheuëh Keusôleutanan Acèh Darussalam Tuwanku Hasyém Banta Muda.

Gobnyan lahé bak Gampông Lambada dalam  wilayah Sagoë Mukim 26 Acèh (Acèh Besar jinoë) bak thôn 1834 Masihi.

Nan ayahgeuh Lakseumana Tuwanku Abdul Kadir, sidroë wakilah Keurajeuën Acèh Darussalam blah röt Timu Acèh.


 Tuwanku Hasyim Banta Muda meuadoë-aduën lhèë neuh, yakni na Tuwanku Raja Itam ngön Tuwanku Mahmud Bangga Keucik.


Lagèë silsilah, Tuwanku Hasyém Banta Muda nakeuh aneuk agam nibak Lakseumana Tuwanku Abdul Kadir, ibnu Raja Muda Tuwanku Cut Zainal Abidin, ibnu Sôleutan Alaidin Mahmud Syah, ibnu Sôleutan Abidin Johan Syah, ibnu Sôleutan Alaidin Ahmad Syah, ibnu Nuruddin Abdurrahim Maharaja Lèla, ibnu Fakih Zainal Abidin Syah, ibnu Malik Daim Mansyursyah, ibnu Abdullah Al-Malikul Amin, ibnu Malik Syah Daim Syah, ibnu Abdul Jalil Daim Husain Syah, ibnu Malik Mahmud Hakim Syah, ibnu Muda Daim Syah, ibnu Hasyim Nuruddin Syah, ibnu Mansyur Syah, ibnu Sulaiman Syah Daim Ali Iskandar, ibnu Malik Ibrahim Syah Daim, yakni cèëdara saboh wali nibak ureuëng bako Alaidin nyang nan gobnyan Machdum Abi Abdillah As Syèkh Abdurrauf Al-Mulaqqab Tuwan di kandang Syèkh Bandar Darussalam.


Bak watèë Olanda jitamöng u Acèh, Keusôltanan Acèh bak watèë nyan geumat keurajeuën lé Sôleutan Alaidin Mahmud Dawôd Syah.


Bak watèë nyan keuh Tuwanku Hasyém mula phôn geumat gayam peuranan ngön geutren lam mideuën prang.


Bak watèë nyan pih Acèh ka kacho sabab Olanda ka jiseurang Acèh hingga peureuté awak rayek keurajeuën geupeugöt duëk-pakat.


Nibak hasé duëk-pakat nyan Tuwanku Hasyém Banta Muda geuneuk bôh jeuët keu Sôleutan, tapi gobnyan hán geutém.


Gobnyan leubèh geupiléh Tuwanku Mahmud Syah nyang mantöng muda that jeuët keu sôleutan lheuëh nyan Tuwanku Hasyém geutém jeuët pumangkèë Sôleutan Acèh (Wali Nanggroë) sampé Tuwanku Mahmud Syah trôh umu untôk geupuangkèë jeuët keu Sôleutan Acèh teuma.


Tapi, Sôleutan Mahmud Syah lheuëh nyan keunöng wabah kolèra hingga neuwafeuët bak buleuën Januwari 1874 di Paga ayé (Pagar Air), Acèh (Acèh Besar jinoë).


Lheuëh nyan Tuwanku Hasyém Banta Muda geuneuk bôh lom keu Sôleutan. tapi hán geutém cit lom, dan geuyuë bôh Tuwanku Muhammad Dawud Syah nyang mantöng muda dan Twk Hasyém geutém lom jeuët keu pumangkèë Sôleutan.


Prang-muprang makén rayek hingga banda keurajeuën suwah geupinah u Keumala,Pidië.


Tuwanku Hasyém Banta Muda, Wali Neugara Keusôltanan Acèh Nyang Keuseuneulheuëh
Jirat Tuwanku Hasyém Banta Muda Lam Seulingka Pageuë Seumeujid Jameun Padang Tiji. (Foto: via google.com)

Bak thôn 1879 Tuwanku Hasyém Banta Muda ka meutamah tuhaneuh tapi jiwa patriot ngön seumangat jihadneuh nyan teutap mantöng meuapui-apui untôk geuprang Olanda.


Gobnyan ka geuduëk di Keumala Dalam deungön Sôleutan Muhammad Dawud Syah. Lheuëh nyan Sôleutan Muhammad Dawud Syah ka rayek, bak thôn 1894 Tuwanku Hasyém Banta Muda ngön keuluwareuganeuh geuwèh di Keumala Dalam geuwoë u Reubèë bak rumoh Raja Meunasah Runtôh.

Lheuëh nyan bak thôn 1896 gobnyan geuriwang u Padang Tiji. Lheuëh geumat pimpénan na trép 20 thôn seubagoë pumangkèë Sôleutan.


Pah nibak uroë Jeumeuát 22 Januwari 1897 Tuwanku Hasyém Banta Muda neuwafeuët bak umu 63 thôn dan geuseumiyub di geuniréng Seumeujid Tuha Padang Tiji bak mukim Palôh Keucamatan Padang Tiji, Pidië.[]

ARTIKEL TERKAIT

Terupdate Lainnya