Ceurapè Jeunèh Meunatang Herpestes

Redaksi Selasa, Januari 17, 2023 Bahsa Comment

Ceurapè || Foto: facebook/buchary budiman

ACHEHNETWORK.COM - Ceurapè nakeuh jeunèh meunatang Herpestes udéb kleuët keudroë lam alam bibeuëh, lam uteuën bluka. Badanjih bulat sireuta ikujih panyang ngön paneuk gaki. Meunatang nyan ladém udéb meukawan atawa mupasang-pasang , lom seutiya that keu pasanganjih, kayém peugèt eumpung lam reuhung tanoh, lam lungkiëk teunamön kayèë atawa lam teunamön batèë keu teumpat peulahra aneukjih. Sitiëb sa'at jiteubiët lam eumpung teutap ji tôh 'iëk bak babah eumpung keu meulahra aneukjih nibak meunatang buëh la'én ( predator) . Meunan meunatang buëh la'én toë keunan laju jipluëng peusiblah droë ho la'én sabab nyan meureukaih bahya. Aneuk ceurapè na saboh,duwa atawa lhèë boh lom jareuëng takalön leubèh nibak nyan.

Eumpeuën ceurapè nyan nakeuh mubagoë macam umpama glang tanoh, cangguëk, eungkôt , uleuë, lom aneuk-aneuk meunatang la'én umpama aneuk manok, aneuk iték atawa aneuk-aneuk cicém la'én nyang na lam uteuën bluka atawa paya. Ceurapè nyan nakeuh musôh mupusaka beugi uleuë. Asai meurumpök uleuë ubeut atawa rayek bandum jipoh maté. Uleuë nyan h'ana daya lawan ceurapè bahpi uleuë seudông sakalipôn mandum talô lawan ngön da ceurapè nyan.

Sitiëb meurumpök da ceurapè ngön uleuë laju jeuët prang meugeugasui akhé jih uleuë nyan maté jihuë bangké puwoë keu eumpeuën aneuk jih lam eumpung. Meunyo di Banua Afrika lam gurôn Kalahari na udéb meunatang Honey Badger, meunatang sijeunèh cagèë ubeut bagah ngön caca leupahna bak jipoh uleuë. Cagèë nyan eumpeuën utama jih cit uleuë, ië unoë ( madu) , tikôh atawa meunatang-meunatang la'én udéb lam reuhung tanoh atawa guha kareuëng lam padang gurôn nyan.

Meujan-jan na ta deungö narit ureuëng gampông geukheun :

" ka duëk beujiôh lom keudéh bak ceurapè weuëk pèng".

H'an töm na lom sijarah ceurapè nyan ji ngui deureuham jak mubloë u keudè. Narit nyan nakeuh mumakna pansië keu sidroë-droë ureuëng duëk atawa tinggai lam glé tapi h'ana sapeuë na hareukat. Pansië nyan nakeuh narit keu ureuëng beu'ö pubuët-buët.

Tacah uteuën beungèh ceurapè

Tacah seukèë beungèh meuruwa

Tacukô ôk beungèh gutèë

Tapoh sitèë deungön tuba

Deungön tok tapoh tikôh

Tadrob lapôh deungön jrat

Peugöt pageuë keu jroh lampôh

Bak suët reu'ôh meuhareukat

Tubôh sihat wasé tapajôh

Tinggai lampôh nyan keu boinah.

Wallahu 'aklam BB.

Seunurat: