Hiroë Reusam Éndatu, Ureuëng Gampông Ië Lhôb Geupeugöt Khanduri Bungong Kayèë.

Acheh Network - Ureuëng gampông Ië Lhôb, Keucamatan Tangan-tangan, Kabupatèn Acèh Barat Daya (Abdya) geupeugöt acara Khanduri Bungong Kayèë, Bak Uroë Lasa (17/1/2023).

Geuchik gampông Ië Lhôb, M Ali, geupeugah, Khanduri Bungong Kayèë nyan nakeuh tradisi nyang geupeuwaréh lé éndatu nyang ka geupeubuët seucara turôn-teumeurôn deungön cara nyang meu’islami.

Khanduri nyan geupeugöt lam sithôn sigö nyang ka jeuët keu tradisi ureuëng sinan. Jadi, tiëp jitamöng buleuën Jumadi Akhé lam thôn Hijriyah ureuëng sinoë geupeugöt acara khanduri Bungong Kayèë, buët nyan geupimpén lé peutuha Seuneubôk." kheun Geuchik M. Ali.

Meuneurôt geuchik M. Ali, khanduri nyan nyang geupeugöt lé ureuëng nakeuh saboh beuntuk rasa syukô keu Poteu Allah hingga wasé panèn beu Beurkah.

Seulaén nyan, khanduri nyoe that göt untôk geupeubuët, seulaén nibak teujaga reusam khanduri nyan pih jeuët keu peusambat silaturrahim sabé-sabé ureuëng meugoë.

Lheuëh acara ngön geumeudu'a, panitia khanduri geujôk seudeukah keu aneuk-aneuk miët nyang jak keunan, lheuëh nyan ureuëng geupajôh khanduri ramè-ramè bak teumpat nyan.[]