Tiwah Atawa Siwah

Redaksi Rabu, Januari 18, 2023 Bahsa Comment

Cicém Siwah/tiwah || Foto: facebook/buchary budiman

ACHEHNETWORK.COM - Siwah atawa Tiwah nakeuh cicém Butioninae kayém pö meulayang-layang di andara sara jilhôh ( zoom) pat na eumpeuënjih ( mangsa) teungöh meulata atawa meujak- meujak hinoë di bumoë. Cicém siwah nyan na mubagoë macam jeunèh wareuna bulèëjih, burék-katék, putéh meuneung mirah, klabèë ngön sibagoë nyan lom bulèë iku jih panyang meuteupui plang-pleut wareuna.

Cicém nyan buëh that jisrubeuët bandum cicém ubeut la'én keu eumpeuënjih. Babah ji meukuw'èt parôh lom gukèë gakijih tajam ngön tincu that jiklok ngön teubuët eumpeuën sara jisama ngön bagah leupahna. Bahpi meunurôt haba bak jameun Nabi Sulaiman siwah nyan ka teupiléh sibagoë raja cicém hingga meulakab nanjih " Rajawali ".

Bah that meunan si rajawali nyan h'ana jithèë droëjih sibagoë raja harôih jaga keuamanan ngön keuseulamatan ubéna cicém la'én sibagoë rakyatjih. Bandum cicém la'én jisama ngön jipajôh keu eumpeuënjih, trôk 'an bak aneuk manok ji peulahra lé manusiya, peuë lom tikôh, eungkôt, uleuë ngön lom sigala macam bangké ji pajôhcit. Bandum cicém la'én teumakôt that keu siwah nyan, bahpi kleuëng atawa keuleubôk sikalipôn tundôk keu rajawali nyan.

Manusiya sibagoë meukheuluk Allâh nyang caröng akai ngön bôh piké, jimita ilah daya jidrob rajawali nyan. Jipeugöt rangkab atawa tarön jibôh eumpeuën keu boh lum-lum hingga siwah nyan bak meu-asé jidrob. Meunan jiteumeung laju jikurông hingga seu'iët keu soë jaga tulô ngön miriëk bèk jipajôh padé lam blang mulai rhoh hingga padé nyan masak jeuët takoh. Siwah ka seu'iët nyan jiikat bak sikrèk tihang jiglöng sinan samat teungöh umöng. Bandum miriëk ngön tulô gadöh beuhe keumeung jak pajôh padé bahpi h'ana manusiya nyang riyeuë atawa tarék neurin geureughak di rangkang,

Dak 'an ( konon) haba peuneugah cicém siwah nyan bagah that teureubang hingga trôk 190 km/ jeuëm lam beunileuëng ( speed limit) bagah ngön cicém la'én. Wallahu 'aklam.